होळीचा रंग.

https://youtu.be/VQqu-JYQUZY

खेळताना रंग बाई होळीचाऽऽ होळीचाऽ
   फाऽटला गं कोना माझ्या चोऽळीचाऽ
फाऽटला गं कोना माझ्या चोऽळीचा......
     लहानपणी होळी जवळ आली की रेडिओवर हे गाणं हमखास लागायचचं.... खरं म्हणजे बालवयात होते तोपर्यंत या गाण्याचा ठेका आणि त्यातील अनुप्रास अलंकार यांच्या नादमाधुर्यामुळे व अर्थातच सुलोचनाबाईंच्या ठसकेबाज आवाजातलं हे गाणं मला फार आवडायचं.म्हणजे आजही मला ते आवडतंच. यात शंकाच नाही.... सुलोचनाबाईंनी आपल्या पहाडी आवाजात ते एका उच्च पातळीवर नेऊन  बसवलंय असं म्हटलं तर वावगं ठरणार नाही.....
    पण वयाच्या आणि विचारांच्या कक्षा जशा रुंदावत जाऊ लागल्या तसं या गाण्याचं, जे केवळ ऐकून सुखावह वाटत होतं,ते नंतर मात्र अर्थ जसा समजू लागला तसं, हे  तर फारच 'बोल्ड' आहे असं जाणवू लागलं.....  ते ऐकताना आवाजही हलकाच ठेवावा, न जाणो आपण हे गाणं ऐकताना कोणी बघितलं आणि आपल्या विषयी गैरसमज करून घेतला तर.... अशी एक भीती वाटायची त्या वेळी....
    आमच्या ऐन तारुण्याचा काळ....अहो म्हणजे,आजही आम्ही तरुण आहोतच....फक्त तारुण्याच्या उत्तरावस्थेत झुकलोयं एवढंच.... असं म्हणा हवं तर.... आमच्या पिढीच्या तारुण्याचा काळ हा सुलोचनाबाईंच्या लावण्यांच्या प्रेमात पडण्याचाच तर होता...... तेंव्हांच्या त्यांच्या बहारदार लावण्या आजही तेवढ्याच बहारदार आहेत....          
    पण तो काळ मात्र आजच्या सारखा नव्हता....राजरोसपणे कॅसेट किंवा रेकॉर्ड ऐकावीत आणि अशी गाणी ऐकावित...असा रिवाज त्यावेळी निदान मुलींसाठी तर नक्कीच नव्हता....
     हल्ली सोशल मिडिया च्या या गर्दीच्या जगतात मनात आलं की पटकन हे गाणं ऐकलं आज मी.... पण तरीही घरात कोणी आपण ऐकताना "आॅब्जेक्शन" घेणार नाही ना?.... अशी पाल चुकचुकलीच मनात....
    हे गाणं चालू असताना आपोआपच ऐकणाऱ्याच्या ओठावरही यातील शब्द येतात आणि आपण गुणगुणू लागतोच....आपल्याला आपणच  खूपच बोल्ड झालो आहोत असं वाटत..... पण असू देत,
  होली हैऽऽऽ म्हणत म्हणत या गाण्याने ऐकताना खूप मजा आणली हे मात्र नक्की....
   तर ,बघा धुळवंडीच्या निमित्ताने तुम्हाला ऐकता आलं तर हे होळीच्या रंगांचं गाणं तर... सोबत लिंक आहेच. आणि आणखीन एक मला आवडणारं होळीचंच गाणं....
आवडेल नक्कीच तुम्हालाही....

*नंदिनी म.देशपांडे.*

https://youtu.be/dmDIGeKbO14

🤗🤗🤗🤗🤗🤗