*शुभारंभ*
।गणपती बाप्पा मोरया।
शुभ+आरंभ=शुभारंभ.
कोणत्याही,अगदी छोट्याशा पण महत्वाच्या कामाची सुरुवात आपण ज्या क्षणापासून करतो तो त्या विशिष्ट कामाचा शुभारंभ असतो,असे आपण मानतो..
काम महत्वाचे असते म्हणून सुरुवातही शुभ मुहूर्तावर, शुभहस्ते आणि शुभदिनी व्हायला अशी आपली अंतरिक इच्छाही असतेच हो ना?
तर असा हा शुभारंभाचा क्षण आपण साजरा करतो..
आपल्या हिंदू संस्कृतीत या क्षणाला फार महत्त्व आहे...
कोणी श्रीफळ फोडून,कुणी छोटी मोठी पुजा घालून तर कोणी एखाद्या विशिष्ट दिनाचे औचित्य साधून हा शुभारंभाचा योग साधत असतो....
पण खरं सांगावयाचे झाले तर, कोणत्याही कार्याच्या शुभारंभाला माणसांच्या घोळक्या शिवाय शोभा नाही असेच म्हणावे लागते....
शुभारंभी कुटुंबातील सारे उपस्थित असावेत ही मनोधारणा असणं अगदीच रास्त आहे..
म्हणूनच शुभारंभ दणक्यात करण्याची प्रथा पडली असावी असे वाटते..
शुभारंभाचा घाटच मुळी घातला जातो,तो आपण करत असलेल्या कामाची वाच्यता चार माणसांत होऊन त्याला प्रसिद्धी मिळावी,त्याचे कौतूक व्हावे आणि समाजाने याची दखल घ्यावी यासाठी...
'शुभारंभ' ही संकल्पना म्हणूनच सामाजिक आहे.
हे लक्षात घ्यावयास हवे की, शुभारंभ हा केवळ चांगल्या,समाजहिताच्या आणि सकारात्मक भावनेने केलेल्या कामाचाच झाला पाहिजे तर आणि तरच ते काम लोकांची वाहवा मिळवेल.
हल्ली शुभारंभाला उद्घाटन समारंभ असेही संबोधले जाते...पण शुभारंभ हा पारंपरिक शब्द कसा भारदस्त आणि ईश्वरी वरदहस्त सवे घेऊन आल्या सारखा वाटतो... म्हणून तर आरंभ देवतेची, विघ्नहर्त्याची पुजा या प्रसंगी घालतात याला नक्कीच पुष्टी मिळते....
चला तर सख्यांनो,उत्तरायणाच्या साक्षीने आपणही मरगळ झटकू या आणि नव्याने लेखनाचा श्रीगणेशा करुन शुभारंभ करु या.
©️नंदिनी म.देशपांडे.
जाने.१९,२०२३.
🌹🌹🌹🌹🌹
