*अनुबंध*
दुर्गा पांडे २६,मे रोजी,प्रभाकराशी जन्मगाठ बांधत उर्वरित आयुष्यभरासाठी दुर्गा उमरीकर बनली आणि लक्ष्मीच्या पावलांनी उमरीकरांच्या घरात प्रवेशती झाली....
आज २६,मे आईच्या आयुष्यातील हे क्षण तिने आठवणीतून कायम जपून ठेवलेले कित्तेकदा आम्हाला सांगितले होते...या निमित्ताने प्रकर्षाने उफाळून आले आज....तिची सय करुन गेले.....
दुसऱ्या दिवशी औंढा नागनाथ येथे तिच्या वडिलांनी,नानांनी दिलेले गावजेवण सोहळा आटोपून सासरच्या घरी प्रवेश करताना वाजंत्री शिवाय माप ओलांडले होते तिने आपल्या घराच्या उंबऱ्याच्या आत ठेवलेले....
वाजंत्रीला फाटा दिला गेला कारण या दिवशी सकाळीच पंतप्रधान पं. नेहरु यांना देवाज्ञा झाल्याची बातमी आली होती....
सोळा वर्षांची दहावीची परिक्षा दिलेली दुर्गा,या घरची सून म्हणून प्रवेशली अन् या कोवळ्या जीवावर एका गृहलक्ष्मीची मोठी अणि महत्वाची जबाबदारीही येऊन पडली....घरातील एकुलत्या एक लाडक्या मुलाची बायको,अर्थातच ती पण लाडकी बनत गेली....आपल्या कर्तव्याला जागून,टापटिपीचा संसार करुन,जबाबदारीने आपली सून,बायको,वहिनी
मामी इत्यादी भुमिकांच्या नात्यांमध्ये प्रेम,आपुलकी यांची पेरणी करत करत....
सासू सासऱ्यांच्या गळ्यातील ताईत केंव्हा बनलोय आपण ,हे समजलेही नाही तिला....
नव्याने प्रवेश केलेल्या घरी रग्गड आमराई होती...
दर वर्षीच यथेच्छ पणे आमरसाचा आस्वाद सोबतच माहेरपण आणि उन्हाळी सुट्ट्या असं औचित्य साधत येणाऱ्या तिघीही नणंदा,त्यांची मुलं व तिनही जावई यांनी दोन तीन महिने घर कसं भरलेलं असायचं....या साऱ्याना भेटावयास म्हणून ईतर जवळीकीची नातेवाईक मंडळी यांचाही राबता असायचाच....पण नेमक्याच नवीन नवरी बनून आलेल्या दुर्गाला थोडं गोंधळून थोडं संकोचून जायला व्हायचं....पण तिच्या लावून रहाणाऱ्या स्वभावाने तिने प्रत्येकाच्या मनात आपली अशी एक जागा व्यापून ठेवली होती....कायमचीच...हे तिचं व्यापून रहाणं हा तिच्यातल्या चांगुलपणाचा,तिच्या सेवाभावी वृत्तीचा आणि तिच्या थोरांना आदरयुक्त वागणुकीचा पुरावाच होता असे म्हणता येईल....
© *नंदिनी*
💠💠💠💠💠💠
