*चोचले जिव्हेचे*
*कांदा भजी*
खरं म्हणजे,पाऊस आणि कांदाभजी यांचं नातं कोणी लावलंयं माहित नाही, पण मोठं झक्कास आहे!
आषाढाचा महिना आहे हवेमध्ये कुंदपणा दाटून आलाय...आकाशात काळ्या मेघांची दाटी झालीए....त्यांची गार गार हवेने छेड काढलीए...बिचारे चिडून बरस बरस बरसताहेत....अशा या मस्त पावसाळी हवेचा आनंद आपण छानपैकी गरमागरम कांदाभजी बनवण्याचा बेत करुन साजरा करतोय....सुटले ना तोंडाला पाणी!
कांही ठिकाणी कांदा भजी खेकडा भजी म्हणून ओळखली जातात...कांद्याचे काप उभे केल्यास तसा आकार येणारच,पण म्हणून एवढं किळसवाणं नाव?खाण्यावरची वासनाच जाईल माणसाची....असो...
पण काहीही म्हणा पाऊस आणि कांदाभजी यांचं जमलेलं सुत छानच!
मला वाटतं याच कारणानं आषाढातच कांदेनवमी येत असणार...चातुर्मासात 'कांदा बंद' चा नारा दिला जातो काही घरांमध्ये,तो पाळण्याचं निमित्त करुन कांदाभजी होतात घरोघरी...हल्ली महिला मंडळात तर या निमित्ताने पावसाळी सहली आयोजित केल्या जातात....कांदाभजीच्या पार्ट्या होतात म्हणे....
आमच्या मराठवाड्यात भजांचं जुनं नाव"बोंडं",असं आहे...जुनी लोकं आजही असेच संबोधत असतील,पण असं संबोधन करणारी पिढी आता नामशेष होण्याच्या मार्गावर आहे....पण नंतरच्या पिढीला हे भज्यांचं नाव
कांही पचनी पडलं नाही....अहो,बोंडं म्हटलं की मोठे मोठे बेसनाचे तळलेले गोळेच दिसतात डोळ्यासमोर....ते कसे पडणार पचनी?
मग थोडसं नाजूक नाव, हिंदीतून घेतलंयं मराठीत उसनं खास भज्यांसाठी ते म्हणजे"पकोडे".असं म्हणताच,गरमागरम, कुरकुरीत,छोटी छोटी कांद्याची किंवा मिरचीची झणझणीत किंवा पारशी दोडक्यांची किंवा पानकोबीची किंवा पालकाची अशा सर्वच चवींची चवदार लागतात....
भजी हे नामाभिदान तसं बरंए पण त्याला पकोड्यांची सर नाही असं माझं मत आहे...
पण काहीही असो,हा पदार्थ स्वरुपात,नावात कितीही बदल झाला असेल तरीही खमंग आणि चवदारच!
गरमागरम आस्वादाचा भुकेला....करणाराची आणि खाणारांची भट्टी एकदा जमली की,दोघंही कंटाळणार नाहीत अशीच....एव्हाना पावसाळी कांदाभजींची एक एक फेरी नक्कीच झाली असणार घरोघरी....आता दुसरी फेरी कांदेनवमीच्या दिवशी होय ना?
👍🏻😊
©️
*नंदिनी म.देशपांडे*
🌹🌹🌹🌹🌹🌹