पुस्तकाचे नाव:
द सायलेंट स्टाॅर्म.
लेखक - नारायण कुडलीकर.
काहीच दिवसांपूर्वी नव्यानेच प्रकाशित झालेलं हे पुस्तक....पुस्तकाचे लेखक श्री नारायण कुडलीकर, यांच्या कुटुंबाशी आमचे फार पुर्विपासूनचे कौटुंबिक नातेसंबंध.....
त्यांनी मला स्वतः आवर्जून घरी आणून दिलेलं हे पुस्तक....मला म्हणाले,तू वाच आणि मला प्रतिक्रिया पाठव कसे वाटले पुस्तक याची......
पूर्विच वाचनासाठी हाती असलेले पुस्तक संपवून मी लगेच "द सायलेंट स्टाॅर्म" वाचावयास घेतलं,आणि काय सांगू!वाचून पूर्ण होईपर्यंत जीवाला चैन पडेना... दररोजच्या दैनंदिनीतून वेळ मिळेल तसे तीन दिवसांत वाचून काढले मी हे आणि पूर्ण झाले की मोठ्ठा उसासा सोडला अगदी नकळतपणे....
मला ऐकून माहिती असलेली आलेल्या या वादळाशी या सर्वांनी दिलेली झुंज, पण "द सायलेंट स्टॉर्म" वाचल्या नंतर आपण या लढाईचे प्रत्यक्ष साक्षीदार आहोत असे वाटावयास लावणारे हे शब्दांकन....
आता प्रतिक्रिया लिहावयाची....खरंच काय लिहू? कसे लिहू?असे झाले अगदी...इतर पुस्तकांसारखे परीक्षण लिहिण्याच्या पलिकडचे आहे हे द सायलेंट स्टॉर्म....जेथे नियतीनेच आयुष्याच्या सारीपाटावर एवढी कठिण परिक्षा घेतली,त्याचे मी बापडी काय परीक्षण करणार आणि लिहिणार!
हे खरं म्हणजे लेखकाच्या भावविश्वाचे,पुस्तक रुपात व्यक्त झालेले एक मनोगत आहे...साध्या सरळ माणसाच्या आयुष्यात ध्यानीमनी नसताना दबक्या पावलांनी एखादं वादळ यावं आणि हळू हळू त्याने अख्खं वर्षभर याच व्यक्तीच्या, त्याच्या कुटुंबाच्या भोवती घोंघावत राहावे...साऱ्या कुटुंबाच्या मानसिक, शारीरिक क्षमतेची परीक्षा घ्यावी आणि अत्यंत पराकाष्ठेचे प्रयत्न करत, या सर्वांनी मिळून हे वादळ परतवून लावावं....
ते परतवताना स्वतःलेखकाच्या आणि त्यांच्या कुटुबीयांची होणारी मानसिक,भावनीक घालमेल...त्यांनी दाखवलेली कमालीचा खंबीरपणा, सकारात्मकता,जिद्द आणि त्यासाठी लागणारे प्रचंड मनोबल, ईश्वरावरची त्यांची श्रध्दा,प्रेमाच्या,मैत्रीच्या,आणि रक्ताच्या नात्यांची ही वास्तव कहाणी आहे....
देवानेही एखाद्याची किती परीक्षा बघावी आणि परिक्षार्थीने प्रचंड मनोधैर्य सांभाळत त्यात यशस्वी व्हावे...त्या यशाची ही खरी कहाणी आहे असे म्हटल्यास वावगे ठरणार नाही....
आयुष्याच्या एका वळणावर नियतीने घेतलेल्या परीक्षेची द सायलेंट स्टॉर्म ही, प्रत्यक्ष परीक्षा चालू असतानाचे अप्रत्यक्ष वर्णन... पण वाचकाला वाचताना खिळवून ठेवणारे...पुढे काय झाले असेल?याची उत्कंठा सतत जागृत ठेवणारं, अप्रतीम शब्दांकन....
लेखकाच्या मनाने घेतलेल्या ध्यासाची,पत्नीप्रेमाची,संसाररथाचे एक चाक खोल गर्तेत अडकले असेल तर, त्या चाकाला सर्वशक्तीनिशी वर उचलून सुरक्षित ठेवण्यामागचे अत्यंत भावस्पर्शी मनोगत आहे हे पुस्तक....
लेखकाने आयुष्याच्या एका टप्प्यावर दिलेल्या परीक्षेच्या प्रश्नपत्रिकेची द सायलेंट स्टॉर्म ही यशस्वीपणे सोडवलेली उत्तरपत्रिका असेच वर्णन मी करीन ह्या पुस्तकाचे....
कोणत्याही व्यक्तीच्या आयुष्यात कधीही असे निर्णायक क्षण येऊ शकतात...पण आलेल्या परिस्थितीला,आपल्याच सहचारिणीच्या बाबतीत आलेल्या गंभीर आजारपणाला जीद्दीने आणि अत्यंत सकारात्मकतेने,यत्किंचितही मनोधैर्य खचू न देता यशस्वीपणे कशी मात करावी?याचा पाठ घेण्यासाठी प्रत्येक व्यक्तीने वाचावे असे हे पुस्तक...
आपल्या पत्नीच्या गंभीर आजारावर मात करत असताना कौटुंबिक सदस्यांपासून ते डॉक्टर मंडळींपर्यंत ज्यांचा म्हणून सहभाग लाभला त्या सर्वांच्याप्रती आदरभाव व्यक्त करणारं हे एक मनोगत...
वाचताना पूर्णपणे गुंतून जात भावूक बनत जातो वाचकही....आणि हिच लेखकाच्या लेखणीची ताकद आहे हे मान्य करावेच लागते.... पुस्तक वाचत असताना...
घरातील एखाद्या सदस्याच्या बाबतीत गंभीर आजारपण आलेलं असताना समयसुचक वृत्ती जोपासत योग्य निर्णय भराभर घेणं कसं गरजेचं आहे,आणि अशा आजारांनी येण्यापूर्वी पेशंटला दिलेले पुर्वसंकेत गंभीरपणे हाताळण्याची किती गरज असते,
या सर्व बाबींचा उहापोह द सायलेंट स्टॉर्म या पुस्तकात आहे...
वैद्यकीय क्षेत्रातील व्यक्तीने लिहिलेले नसेल तरीही आपल्या माणसाच्या (पेशंटच्या) उद्भवलेल्या गंभीर आजारपणावर वैद्यकीय उपचार करताना,पेशंटचा काळजीवाहक म्हणून भुमिका बजावताना घ्यावयाची काळजी, डॉक्टरांच्या सुचनांचे काटेकोर पालन,पेशंटच्या खाण्यापिण्याच्या औषधांच्या वेळा,पेशंटची शारीरिक स्वच्छता करण्याची पध्दत,पेशंटचा व्यायाम या सर्वच गोष्टींची इत्यंभूत माहिती आपल्याला अचूक मिळेल असे हे पुस्तक होय..
एकूणच हे पुस्तक अतिशय वाचनीय बनले आहे...
पुस्तक पुर्ण वाचले आणि मनोमन लेखक श्री नारायण कुडलीकर यांच्या अथक प्रयत्नांना सलाम करत, सौ.अलका ताईंना,उदंड उदंड आयुष्याचं दान मागण्यासाठी ईश्वरासमोर हात जोडले... प्रार्थनेसाठी अलगद ओठांवर शब्द उमटत गेले....
श्रीकांत उमरीकर यांच्या जनशक्ती वाचक चळवळ प्रकाशनाखाली प्रकाशित झालेलं हे द सायलेंट स्टॉर्म पुस्तक निश्चितच वेगळ्या धाटणीचं,पण मार्गदर्शक असं एक चांगलं पुस्तक किंवा छोटी कादंबरी आहे...
श्री नारायण कुडलीकर यांनी व त्यांच्या कुटुंबीयांनी तोंड दिलेल्या या वादळातून सहीसलामतपणे त्यांची अर्धांगिनी बाहेर पडली आणि ती सुखरुप आहे यासाठी या सर्वांचे अभिनंदन आणि हार्दिक शुभेच्छा....
©️ नंदिनी म. देशपांडे.
मार्च,१०,२०२३.
🌹🌹🌹🌹🌹🌹
कोणत्याही टिप्पण्‍या नाहीत:
टिप्पणी पोस्ट करा