चोचले जीभेचे....
__________________
*वरणफळं*
अगं मावशी अहाहा,काय टेस्टी झालीए डिश!मावशी,तू ना, पुण्यात राहिला आलीस ना की,तेथे एक छानसा स्टॉल टाक वरणफळांचा. बघ मस्त रिस्पॉन्स मिळेल....
माझ्या भाचीच्या वेदश्रीच्या या सिरियसली बोलण्याचे मला हसू आले...
पण तिच्या म्हणण्यात तथ्य आहे,म्हणजे चवीच्या बाबतीत.... खरंच तर आहे ते!आपला पारंपरिक पदार्थ पिढ्यान् पिढ्यांपासून वेगवेगळ्या चवीने बनवला जाणारा... वेगवेगळ्या पध्दतीनं बनवला जाणारा...पण कॉम्बिनेशन एकच तुरीच्या डाळीच्या पातळ वरणात कणकेचे लाटून छोटी छोटी फळं(पुरी) टाकून त्यात शिजवायची....
कुणी साध्या वरणात बनवतं,कुणी आंबट वरणात तर कुणी मसाल्याच्या वरणात...मला मात्र ही फळं
आंबटगोड वरणातलीच आवडतात...तेही पहिल्या वाफेचे...वरण पातळ असेल तेंव्हाचे तर फारच चवीष्ट!
गरमागरम वाढून घेत, छान पैकी हात सोडून त्यावर तुपाची धार टाकावी आणि लोणचं चटणी सोबतीला असावं...बस्स...
यातही एक एक वेगवेगळी पुरी करुन सोडलेली जास्त चवदार लागते... शंकरपाळी बनवून एकदमच शिजवलेली गिजगा होतात आणि माझ्या मते बेचव लागतात...
पण खरंच ही वरणफळाची डिश आहे मोठी टेस्टी....या लॉकडाऊनच्या काळात भाजीशिवाय बनवता येणारी, वेगळ्या चवीची पण एक वेगळी डिश,उकडीची म्हणता येईल अशीच.आठवड्यातून एकदा तरी बनवावी अशीच आहे...ठरवा तर मग कधी बनवता ते!!
*नंदिनी म.देशपांडे*
🌹🌹🌹🌹🌹
कोणत्याही टिप्पण्‍या नाहीत:
टिप्पणी पोस्ट करा