पुस्तक परीक्षण
पुस्तकाचे नाव:
"द लॉयर्स कॅम्पेनिअन"
*********
"द लॉयर्स कॅम्पनिअन्" हे जनशक्ती वाचक चळवळ यांनी संपादित केलेलं पुस्तक माझ्या हाती आलं आणि कधी एकदा वाचून काढेन असं झालं...खरं म्हणजे पुस्तक तसं छोटंसंच आहे...सलग दोन तास बैठकीत आरामात वाचून झालं असतं...पण माझ्या इतर अनेक व्यापापायी ते वाचून पूर्ण होईस्तोवर अख्खा आठवडा गेला....असो...
जनशक्ती वाचक चळवळ यांनी संपादित केलेल्या पुस्तकाची मांडणी आणि मुखपृष्ठ नेहमीच वाचकाला वाचनासाठी उद्युक्त करतं...माझंही "आठवणींचा मोरपिसारा" हे पुस्तक यांनीच संपादित केलं आहे...
"द लॉयर्स कॅम्पेनिअन्",ह्या
पुस्तकाने वाचनासाठी उत्सुकता वाढवण्याचे आणखी एक कारण म्हणजे, ते माझ्या मैत्रीणीने दीपाली कुलकर्णी हिने लिहिलेलं आहे... व्यवसायाने वकील असणाऱ्या व्यक्तीच्या संदर्भाने, जो तिचा आयुष्यभराचा जोडीदार आहे, हा धागा कायम पकडत लिहालेलं हे पुस्तक...
मी सुध्दा एक वकील असल्यामूळे सहाजिकच वाचनाचा मोह मला टाळता आला नाही...बघू या तरी एक वकील जेंव्हा संसार रथाचे एक चाक पेलून धरतो, तेंव्हा आपल्या सहचराच्या मनात त्याच्या विषयी काय टिपणी असू शकते?हे तरी समजेल, ही ताणलेली उत्सुकता ठेवतच मी वाचनाला सुरुवात केली....
"द लॉयर्स कॅम्पेनिअन्" यात लेखिकेनं आपल्या आयुष्याच्या वाटेवरचा एक टप्पा म्हणजे पंचेवीस वर्षांचा संसार पूर्ण करेपर्यंत तिला, किंबहूणा तिच्या जोडीदाराच्या व्यावसायिक आयुष्यात आलेले काही अनुभव व्यक्त केले आहेत असे आपण म्हणू शकतो...
एखाद्या वकीलाला त्यांच्या व्यवसायात येणारे अनुभव म्हणजे निश्चितच त्याच्या अशिला संदर्भात असणार...
निरनिराळ्या दिवाणी, फौजदारी, धार्मिक,सामाजिक स्तरावर दावा न्यायालयात लढत असताना त्यांच्या सहवासात आलेले अशिल,त्यांचे स्वभाव, त्यांची मानसिकता आणि तो विशिष्ट दावा यशस्वीपणे हाताळत असताना आलेले अनुभव यांची मांडणी अगदी समर्पक पध्दतीने केलेली दिसून येते...
या छोट्याशाच पुस्तकात एकूण पंचेवीस प्रकरणं आहेत...प्रत्येक प्रकरण अगदी एक ते दोन पानांचंच असेल, पण यात संबंधीत खटल्याचे वास्तव शब्दांकन ज्याला आम्ही आमच्या वकीली भाषेत प्लेंट, किंवा फॅक्टस् म्हणतो, ते गोष्टींच्या रुपात मांडण्याचा प्रयत्न केलेला आहे...यात अगदी थोडक्यात न्यायालयाची पायरी चढण्यासाठी असणारा हेतू व उद्भवलेली कारणं यांचा समावेश आहे...तेवढ्यावरुन वाचकाला या खटल्या संदर्भात अंदाज येऊ शकतो...
पण व्यवसाय म्हणून काम करता करता कशी वेगवेगळी प्रतिष्ठीत मंडळी सहवासात येत गेली आणि त्यांच्याशी कायमचे ऋणानुबंध निर्माण झाले हे फार सुरेख पद्धतीने मांडलंय या पुस्तकात....तसेच एक प्रतिथयश वकील म्हणून आपली जागा तयार करताना सुरुवातीला येणाऱ्या अडचणी त्यावर मार्ग काढत काढत एक यशस्वी कारकिर्द उभी करताना पर्यंतच्या प्रवासाचा घेतलेला वेध म्हणजे "द लॉयर्स कॅम्पेनिअन्",असे मला वाटते...
बरेचदा खटला चालू असताना अशिलाशी आपलेपणाचे नाते कसे निर्माण होत जाते...कधी कधी तनमनधनाने वकिलाला आपल्या व्यवसायात योगदान देणं किती अपरिहार्य असतं...तर कधी कधी बदमाशांशी वारंवार संबंध येऊन त्याचे मतपरिवर्तन कसं घडवता येऊ शकतं....या विषयीचे विवेचनही या पुस्तकातून वाचावयास मिळते...
वकीलाला आपल्या व्यवसायाकडे केवळ "व्यवसाय" म्हणून न बघता मानवतेची कास धरत समाजात एक प्रतिमा तयार करताना त्याच्या गृहलक्ष्मीचे योगदानही तेवढेच महत्वाचे आहे...ती घरची आघाडी सांभाळते आणि संसारात तडजोडी करत आपल्या सहचराच्या यशस्वीतेसाठी कष्ट घेते याचा आढावा या पुस्तकातून बर्‍याच ठिकाणी उधृक्त होते...
शेवटी संसार हा दोघांचा असतो..
तडजोड नामक चावी दोघांनीही सांभाळली आणि परस्पर विश्वासाची कास धरली की तो कसा सुखाचा होत जातो आणि या टप्प्यावर कृतकृत्यतेची भावना मनात जोपासत आपण किती समाधानाने भरुन पावलो आहोत यांचा मांडलेला आलेख म्हणजे दीपाली कुलकर्णी यांचं "द लॉयर्स कॅम्पेनिअन" हे पुस्तक होय...
यात या दोघांच्या संसारात अनुभवलेले, व्यवसायात आलेले अनुभव आहेत पण हे आत्मचरित्र निश्चितच नव्हे....काही ठिकाणी कथेचे स्वरुप घेत लिहिलेले लेख आहेत तर काही ठिकाणी मनोगत वाटावे अशी व्यक्त झाली आहे लेखिका....
आणि या टप्प्यावर मिळणाऱ्या समाधानाला ती दुरुन न्याहाळत आहे ही जाणीव करुन देणारं असं हे पुस्तक...एकदा तरी निश्चितच वाचावं असंच आहे...
लेखिका ---
नंदिनी म. देशपांडे.
जूलै 8,2022.
औरंगाबाद.
🌹🌹🌹🌹🌹
कोणत्याही टिप्पण्‍या नाहीत:
टिप्पणी पोस्ट करा